ढूंढता रह ज्याओगा !!!!!!!!!!!!!! 

लुगाइयों का घाघरा, खिचड़ी का बाजरा,
सिरसम का साग, सिर पे पाग, 
औंगण में ऊखल, कूण म मूसल, 
घरां म लस्सी, लत्ते टांगण की रस्सी,
आग चूल्हे की, संटी बीन (दुल्हे) की, 
पहलवानां का लंगोट, हनुमानजी का रोट,
घूंघट आली लुगाई, गावं म दाई, 

ढूंढता रह ज्याओगा !!!!!!!!!!!!!! 

घरां म बुड्ढे, बैठकां म मुड्ढे,
बास्सी रोटी अर अचार, गली म घुमते लुहार, 
खांड का कसार, टींट का अचार, 
कांसी की थाली, डांगर के पाली, 
बीजणा नौ डांडी का, दूध दही घी हांडी का, 
रसोई म दरात, बालकां की स्याही की दावत, 
बटेऊआं की शान, बहुआं की आन,
ताऊ का हुक्का, ब्याह का रुक्का, 
पाटडे में नहाणा, पत्तल पे खाणा,
पाणी भरेडा देग, भाण-बेट्याँ रा नेग,

ढूंढता रह ज्याओगा !!!!!!!!!!!!!!